مراد رضا طالب بالصف الثانى الثانوى من قرية بردين بمركز الزقازيق بمحافظة الشرقية  موهبة فطرية على الطريق استطاع ان يحجز له مكانا بين كبار المنشدين والمبتهلين رغم صغر سنه بعد تهافت الاذاعة والتليفزيون عليه وقيامه بالظهور مباشر على التليفزيون والتسجيل للاذاعة عدة مرات ..

قال مراد رضا عن نفسه من وأنا في سن صغيرة في الحضانة كان والدي بيحفظني الانشاد الديني علشان اقوله لمدرسيني في المدرسة وكمان كنت بسمع صحابي سيرة الرسول صلي الله عليه وسلم وامدحه..

اضاف كان كل يوم مدرسيني يطلعوني في الاذاعه المدرسية اقول انشاد دينى لهم ومن هنا بدأت احب الانشاد الديني خاصة المديح فى رسول صلى الله عليه وسلم ..

اشار مراد رضا الى انه في يوم من الايام صديقي واقرب الناس لي توفي بعد تعبه ففضلت محبط جدا وزعلان عليه لحد لما رجعت للمدرسة وطلبو مني اغني لصاحبي اغنيه سلم علي الشهدا اللي معاك فغنيت فلقيت المدرسين بيعيطوا كلهم من هنا بقي حسيت ان صوتي بدأ يوصل لقلوب الناس فحبيت الانشاد الديني اكثر واكثر..

قال مراد رضا لما وصلت للصف الثالث الاعدادي حبيت اشتغل في اي حاجة فاشتغلت في كثير من المهن في مكتبة مرة ومنها ايضا قيامى بمساعدة ناس بتوع بناء وده كله علشان اجيب فون ليا علشان يساعدني في اني انشر علي السوشيال ميديا لحد لما اشتريت الفون وبقيت اسجل فيديوهات وانشر علي كل مواقع التواصل الاجتماعي وبقي الفيديوهات بتجيب مشاهدات كويسة بالنسبالي وبعد كدة نجحت في الصف الثالث الاعدادي ومجموعي دخلني ثانوى عام وكنت مبسوط جدا جدا⁩ و ده كان أول حلم فى حياتي فاشتغلت في الإجازة في مكتبة وكانت فلوس شغلي باجيب بيها لبس ليا علشان ابقي اروح بيها المدرسة واساعد والدي لأنه لا يملك وظيفه كويسة وبعد مافترة الإجازة خلصت  دخلت أولي ثانوي عام ونجحت في أولي وفي الإجازة اشتغلت في محل بيبيع حجات البناء واثناء ذلك جت لى حلقه علي التلفزيون المصري في برنامج اسمه مواهب من مصر ودي كانت تاني خطوة في حياتي كنت مبسوط جدا اني هطلع علي التلفزيون وعلشان والدي هيفرح بيا هو ومامتي لاني بحاول افرحهم حتي عرفت ان والدي بيبكي جدا لاني ظهرت في حلقه مباشر علي التلفزيون وهذا بكاء الفرحة فده كان بيساعدني اني اكمل و امدح الرسول صلى الله عليه وسلم وخلق عندى عزيمة على النجاح..

اوضح انه بعد ظهوره فى التليفزيون بعد كده سجل في اذاعه القرآن الكريم اللى حبوا صوتي جدا وطلبوا منى اني اسجل تاني وسجلت تاني معاهم و استضافونى  علي القناة الثانية والقناة المصرية..

طلب مراد رضا ان تقوم الجمهورية اونلاين بالنشر عن موهبته لانه معروف عنها بانها بتساعد في اكتشاف المواهب وكمان النشر حيفرح والدي ووالدتي..