رئيس مجلس الإدارة
طارق لطفى
رئيس التحرير
أحمد سليمان
طريق السعادة
أحسنوا الظن بالحبايب
د. هاله منصور.. أستاذ علم الاجتماع
"اتقل اتقل ع اللي بيتقل ولا تسألش عليه. وابعت واسأل ع اللي بيسأل ليه تتعذب ليه".. هي نصيحة حلوة بس مع القلوب صعبة قوي. مع القلوب والحنين والمحبة دايما الحبيب مستني حبيبه يسأل عليه. يتمني رضاه. يسعد بقربه. في وجود الحبيب تأتي الدنيا بكل ما فيها. مع الحب والمحبة بتهون الصعاب. بالقرب من الأحبة تنتعش المشاعر وتسعد النفوس وتضاء الوجوه وتلمع العيون. وترتفع معدلات الاحساس بالجمال. والقلوب لما بتحب بترق قوي وبتحس قوي علشان كده جروحها بتوجع قوي.
خلوا بالكم من الأحبة. قربوهم منكم. ارووا الحياة بالمحبة. واجهوا الصعاب بالأحبة. فتشوا عليهم. اكرموهم وقربوهم واستمتعوا بمشاعركم بالقرب منهم. اتدفوا جوه قلوبهم من صعوبة الايام وتغير الأحوال. خليكم اكثر كرماً مع الحبايب. عالجوا الجفا بالمودة. داووا الجراح بالحنية. انعشوا المشاعر بالاهتمام. اهزموا المشاكل بالتغاضي. اطردوا الهموم بالتجاهل. عبروا بلطف واختلفوا برقة. ازعلوا بدلال. اوصلوا الود. راعوا المشاعر.
افتكروا دايما كل حاجة حلوة. وعالجوا بيها الحاجات المرة. احسنوا الظن دون تفريط. حافظوا علي الحب مع الكرامة. اوعوا حد فيكم يهزم الثاني أو يقهره. راضوا حبايبكم من الأهل أو الأصدقاء او الزملاء او الجيران أو أياً كان الإنسان. وتمتعوا بوجودهم وقربهم وافتكروا دايما ان العمر قصير وان فرص الاستمرار غير مضمونة. واذا كان لابد من الفراق خلوه بإحسان ومودة أو حتي ذكري حلوة للحفاظ علي شعرة محبة تمنع الكراهية والندم.
فتشوا عن الحب. ذوقوا طعم المحبة دي المحبة دايما توافق تراضي تواد تراحم بين الأحبة عمرها ماكانت ندية او تصيد أخطاء او عناد او
مكابره. كل ده بيضيع الإحساس بروعة الحب ويعكر صفو المشاعر ويقتل المحبة وهنا بتجف القلوب وهذا هو الباب الرسمي للتعاسة والشقاء. إياكم ودخوله. إياكم ان تميلوا الي الكراهية او تستحضروا الغل والحقد.. حبوا او لا تحبوا. لكن لا تكرهوا ابدا كي لا تتحجر قلوبكم ومشاعركم.
حاولوا دائما ان تكونوا قادرين علي المدح المبالغ فيه للأحباب في لحظات الاحتياج. دربوا أنفسكم علي اللباقة والرقة وقوة الإحساس عند اللوم او النقد او العتاب. الحب كيان لابد له من الحماية والرعاية والعطاء كي يأتي لنا بثمار المتعة والراحة والأمان. وللحديث بقية ان شاء الله.
اترك تعليق