رئيس مجلس الإدارة
طارق لطفى
رئيس التحرير
أحمد سليمان
جواهر: الأغنية اللي مابتتسمعش في الميكروباص ماتبقاش ناجحة
قالت الفنانة جواهر فى تصريحات تليفزيونية: لو معنديش شغل فى رأس السنة، بحب أقضي السهرة فى البيت مع أسرتي، وكان عندي أغنية اسمها "كل سنة وأنت طيب يا حبيبي" لأعياد الميلاد، وكنت خايفة أقدم أغنية "باركوله" لإنها لأعياد الميلاد برضه، بس عجبتني وغنيتها وهى من كلمات عنتر هلال وألحان حسن دنيا وتوزيع إسلام ساسو.
وأضافت جواهر: أغنية "ما اعطلكش" من كلمات محمد عطية، وألحان مصطفى ميسي، ومحمد عطية اللى أقنعني بيها فى أكتر وقت كنت متضايقة فيه.
وتابعت جواهر: الأغنية اللى مابتتسمعش فى الميكروباصات ما تبقاش ناجحة، وفى بداياتي كنت عاملة أغنية اسمها "أسمريكا" كانت بتتسمع فى الميكروباصات، ومن يومها قالوا جواهر مطربة الميكروباصات، وقالوا عليا بعد ما غنيت أغنية حمادة مشروع نجمة، وأما غنيت ع الكورنيش قالوا غني نجمة.
كما اهدت جواهر أغنية "غير بس المصري الأسمراني" للجندي اللي واقف دلوقتي على الحدود وبيحرسنا، وبقولهم كل ثانية وأنتوا بألف خير.
وعن استايل شعرها فقالت بحب أعمل شعرى راستا، وميريام فارس هى أكتر واحدة عملته بشكل عجبنى جدا، والوحيدة اللى عملته صح، ولما ميريام عملته بينك أنا اتشجعت وعملت نفس اللون.
وردت على سؤال اغرب اشاعة فقالت استغربت لما طلعت عليا إشاعة وفاتى من خمس أو ست سنين، وفيه إشاعة سمعتها عني بتقول إني هعمل دويتو مع سمية الخشاب، والحقيقة كان نفسي الإشاعة دي تبقى حقيقة.
وعن عادات الجواز في السودان فقالت عملت أغنية اسمها "إثبات ملكية" عن قسيمة الجواز، والجواز فى مصر أرحم بكتير من الجواز فى السودان، لأنه فى مصر فيه تعاون بين الزوج والزوجة، وحاليا فى السودان الزوجة بقت تساعد فى إقامة الزفاف.
واعلنت انا بحب أتواصل مع جمهوري أكتر على فيسبوك وتيك توك، واستقريت في مصر وكملت دراستي فيها من سنة 1995، وأهل والدتي كلهم فى السودان، وأهل والدي كلهم هنا فى مصر، ولما غنيت أغنية "حبيبي يا أسمريكا" كنت فى 3 ثانوي.
أما عن أكتر إفيه تحبه فى الأفلام قالت: فيلم "سلام يا صاحبي"، صاحبي دراعي وعمى قرشي وده مثل حقيقي بجد، بمناسبة السنة الجديدة أنصح الصديق إنه ما يخونش صاحبه، وبقول لكل الأمهات كل سنة وانتي طيبة يا ست الحبايب.
واختتمت قائلة: بتمنى فى بداية السنة الجديدة أغنية "معطلكش" تنجح وتكسر الدنيا، واحب أشكر أستاذ طارق عبد الله وأستاذ مصطفى كامل وكل الإعلاميين فى كل الوطن العربي وفى مصر بصفة خاصة، وبشكر زوجي مدير أعمالى، وطبعا إذاعة شعبي FM.
اترك تعليق