رئيس مجلس الإدارة
طارق لطفى
رئيس التحرير
أحمد سليمان
«صايم ولا زي كل سنة ؟»
تبدأ يومك الصبح بدري وانت رايح علي شغلك أو جامعتك، الصيام مخليك تعبان شوية، الزحمة والحر بتزود الطين بلة! ماعندكش طاقة تتكلم كتير، ومش قادر تستحمل نوعيات الناس المختلفة اللي بتتعامل معاها.. إحنا حاسين بك، وهنقول لك شوية نصائح للتعامل مع الناس في رمضان.
أنت طبعا عارف أنك صايم بإرادتك، يبقي مينفعش تحمل الناس ذنب أنك مرهق شوية من الصيام، خلينا نحاول نعمل العكس، ونعامل الناس بطريقة افضل ما بنعاملهم في الايام العادية، صيامك مش معناه إنك تعامل الناس بقلة ذوق بحجة "اللهم أني صائم" ، الصيام معناه إنك شخص ناضج بتحاول تقوي نفسك مهما كان استفزاز اي حاجة حواليك ، عشان تثبت لنفسك إنك قوي بجد ، خليك كريم زي شهر رمضان.
شيل من قاموسك جملة "ماتخلنيش أفطر عليك" الصيام الهدف منه تكون أقوى.. هو ده الامتحان الحقيقي.. أوعى تسقط في الامتحان.
تعالي بقي كده.. ايوة انت، عمرك عدي عليك رمضان سواء كنت صغير أو كبير من غير ما تسأل حد او حد يسألك السؤال ده صايم ولا زي كل سنة؟
اوعي وبقولك تاني اوعي تقولها، وبلاش تفتكر أنك ظريف ولطيف لما بتقول الجملة دي.. كمان بقت جملة قديمة قوي قوي على فكرة.
هايفضل رمضان ضيف عزيزعلينا كلنا.. ودايما بيسيب لينا ذكريات كتير متتنسيش.. شاركونا ذكرياتكم الحلوة لشهر رمضان.
كل سنة وانتوا طييبين ورمضان كريم عليكو
هبه حمدي مطاوع
اترك تعليق