هيرميس
الجهاز القومى لتنظيم الاتصالات
مناقشات ساخنة في غرفة عمليات الجمهورية اونلاين حول امتحانات الثانوية العامة وقلق من أولياء الأمور

= اولياء  الامور غير  مطمئنين لسلامة  الامتحان الالكتروني 
= وطلاب يردون.. الورقي  يربك  الجميع

 

شهد  جروب  غرفة عمليات  الجمهورية اونلاين  للامتحانات  عبر  التليجرام مناقشات  ساخنة  بين اعضاء الجروب الذين  تعدي عدده  في ٢٤  ساعة  فقط  اكثر من  الفي  عضو  وعضوة من اولياء الامور الاباء  والامهات  والطلاب  والمعلمين والمعلمات ..

 



بدأت  المناقشات  بسؤال طرحته  الجمهورية اونلاين  علي الاعضاء  قال  فيه  الزميل  سيد جاد  :   
ماذا  تطلبون  من  الوزارة  والدولة  ككل  في حال عقد  امتحانات  الثانوية العامة الكترونيا 
وماهو  المطلوب  لبث  روح الطمأنينة في  نفوس الجميع ووسيلة  الاطمئنان الاكبر  التي  من الممكن  ان  تطمئنوا  من  خلالها ان  ابناءنا  الطلاب  في  ايد  امينة  وان  احدا  لن يتعرض  لمشكلة  اثناء  الامتحانات 
باختصار  ماذا  تطلبون  من  الدولة  والحكومة  ووزارة  التعليم  حتي  تطمئنوا
وبدا   الاعضاء  يدلون بارائهم.
قالت هناء ابراهيم  ولية امر: كل اللي بنطلبة تأمين الامتحان الالكتروني وتأمين النتيجة ابسط شيء ان اي طالب يحاول يفتح اي لينك غير الامتحان الامتحان يتلغى اتوماتيك اي طالب  مش محدث التابلت امتحانه يتلغى ممنوع خروج اي طالب من اللجنة بدون عمل انهاء للامتحان
في مشاكل حصلت في النتيجة في الصف الثاني التيرم الاول واتكررت السنة دي مع الصف الاول والتاني عاوزين نطمن انها ماتتكررش معانا

ايوة يا افندم في مشاكل حصلت في نتيجة الصف الثاني الثانوي التيرم الاول السنة اللي فاتت  طلبة حضرت وظهر لها انها محضرتش   واخر السنة بسبب كورونا كله نجح ومعرفتاش المشاكل اتحلت ولا لأ ونفس المشكلة وغيرها حصلوا السنة دي مع الصف الاول والثاني الثانوي  ومعالي الوزير لغى النتيجة

قالت رحاب محمد توفيق معلم وولي امر لطالب بالصف الثانى الثانوى اولا . ضمان عدم تسريب الامتحانات مثلما حدث في السنوات السابقه ثانيا . ضمان حماية حق الطالب في حالة وقوع السستم وخاصة في تلك السنه المصيريه ثالثا. نحتاج للأبناء وابناءنا نماذج استرشاديه في الأيام القادمة لمعرفة  طبيعية الاسئله رابعا. نحتاج الفتره القادمه ان يطمئن قلوبنا في امتحان شهر مايو ويونيه في إذا كان سيكون الامتحان إلكترونيا او ورقيا خامسا . نحتاج قرارات واضحه  وخاصة في موضوع الكتاب المدرسي وخاصه بعد صدور اخر قرار في عدم التخطيط به أو كتابة الملاحظات لتحقيق مبدا تكافؤ الفرص وانا اري ان جميع طلابنا بجميع الفئات تاخد دروسا والبعض الاخر يعتمد علي المنصات ليس هذا ما يحقق مبدا تكافؤ الفرص سادسا . نحتاج امتحان موحد علي مستوي الجمهوريه لضمان تكافؤ الفرص.

حميدة عبدالقادر ولية امر اتمني من الوزارة و الدولة ككل تنظر بعين الاعتبار للدفعة اللي مرت خلال ال٣ سنوات الماضية بكمية احباطات لا مثيل لها و بكمية عشوائية في القرارات كفيلة تصيبهم باليأس، مفيش ضمان أكيد إن الامتحان الاليكتروني يفتح مع كل الطلبة في نفس الوقت لازم نفكر بموضوعية و بلاش الكلام النظري ده اللي طلباه من الدوله معرفة الواقع اللي احنا عايشين فيه. 

عماد لبيب مدرس  ثانوي من واقع عملى بالثانوى توفير اثناء الامتحان لجنة من الدعم الفنى من المعلمين ذو الخبرة فى الامتحانات السابقة بمعدل عضو لكل ( ٥ ) لجان مع عدم الاكتفاء بمعلمى الاوساط الحاليين حيث ان البعض ليس لهم الخبرة الكافية خاصة العاملين بالابتدائى والاعدادى وبعض العاملين بالثانوى و هذا من اهم البنود. لاننا بخبراتنا التعليمية استطعنا  ادخال الهدؤ والطمأنينة والثقة للطلاب مع معرفتى انا البعض من المدارس لم تشكل لجان للدعم الفنى بسبب عدم خبرة قيادات المدارس وبعض القيادات المسئولة بالادارات والمديريات.

غادة اسماعيل ولية امر: نناشد حضرتك استاذ سيد توصل صوتنا بأن معظم مشاكل الامتحان لسنه مهمه زى دى حلها ان الامتحان يكون ورقى لتلافى أهم مشكله وهى وقوع السيستم...حضرتك ممكن تتخيل معايا طالب ثانويه عامه بيدرس بنظام تعليم جديد بقاله تلات سنين تحت ضغط جامد جداا..وهو في امتحان تالته ثانوى السيستم وقع هيكون إحساسه ايه وهو مش عارف مصير الماده دي ايه وهيكمل باقى المواد ازاى  وفي إحتمال أن برضو السيستم يقع..طيب احساس زمايله فى اللجنه ايه منتهى التوتر والقلق النفسي.. أقسم بالله الموضوع كبير يااستاذ سيد وكلنا ثقة ان حضرتك حاسس بينا وباولادنا.... ياريت امتحان ورقى
اوضحت  انه  اذا كان ولابد  من  الامتحان الالكتروني فنحن نطالب  بضمان لعدم سقوط السيستم... نماذج استرشادية.... اسئله معظمها من المنهج.. ضمان عدم التسريب والغش...يكون فى رد واضح وصريح لو لاقدر الله السيستم وقع في ماده ايه الحل ولازم حل يطمئن الطلبه وأهلهم... وإن الطالب يسمح له بدخول الإمتخان بالكتاب وفى ملاحظاته لأن بالفعل اتكتب في الكتب وصعب نشوف كتب تانى فى الوقت ده

ويرد  الطالب عمر سامي  علي هذا  الراي  قائلا  يا فندم انا طالب في الصف الثالث ثانوي و الامتحانات التجريبه كانت مبشره للغاية...وجود امتحان ورقي سيربك صفوفنا حيث انه من الأكيد رجوع الاسئله المقاليه و سيزيد من فرص الغش الامتحانات التجريبه التي قمنا بها كانت علي افضل وجه ارجو وضع في الاعتبار اننا تخطينا سنتين و نحن نقوم باداء امتحانات الكترونيه و تعودنا علي هذا الأمر كما أن الامتحان الكتروني يضمن جودة الامتحان.

وهنا يعلق  عليه محمود شاكر ولي امر ما شاء الله عليك يا عمر اتكلمت معاك قبل كده وكان رايك ان النماذج الاسترشادية مش مهمة وانك بتذاكر من الكتاب المدرسي بس دون اللجوء الى دروس اونلاين او سنتر او دروس خاصة وان الكتاب كافي جدا  يا ريت الولاد كلهم زيك  موفرين.

قالت  فتحية ابو علي  معلم  خبير و ولية امر ياريت الامتحان يكون ورقى منعا لتعرض الطالب لضغط النفسى والعصبي ومنعا لاستخدام التابلت كوسيله للغش لان المراقب لازم يمر على تاب تاب يبص فيه واللجنه 14او18وكده الطلبه هتظلم وكل طالب مش هياخد حقه  ليه الامتحان ميكنش ورقى الحمد لله تم امتحان الصف الاول والثانى ورقى بدون اى مشاكل ليه نعرض مستقبل اولادنا أن السيستم  يقع أو الكهرباء تنقطع وده تحديد مصير لهم ولاهليهم والمفروض نكلم على حاجه مهمه جدا وهى اتباع الأمور الاحترازية والنظافه والتعقيم وتنظيم اللجان أمام المدارس منعا للتجمهر أولياء الامور ياريت يااستاذ سيد توصل صوتنا للوزير الامتحان يكون ورقى منعا لحدوث اى مشاكل وحفاظا على مستقبل اولادنا ورحمة بأولياء الأمور اللى تحملوا كل المخاطر وخروج أولادهم للدروس فى ظل هذا الوباء وربنا يعديها على خير ويحفظكم ويحفظ اولادنا من كل سوء.

قالت عبير محمد ابراهيم  ولية امر السلام عليكم ورحمه الله وبركاته  يا ريت كلامي يوصل للمسئولين وأنا بتكلم بصفتي وليه أمر طالب بالثانوية العامه  وكنت عايزه أسال السيد الوزير حضرتك مشكور فتحت آكتر من جروب للتواصل مع أولياء الامور للوقوف علي المشاكل الحقيقيه وحقيقه الوضع التعليمي ولكن للأسف القائمين علي تلك الصفحات بمجرد أي رأي مخالف أو يتعارض مع اتجاهات واراء سيادتك تصبح الصفحه من حق الادمين فقط للكتابه والسؤال هنا هو ليه كده حضرتك كان من الواقع عدم وجود الجروبات ده بما إن اغلبيه طلبات أولياء الامور متجاهله وكده كده إحنا بنفذ خطه تطوير حضرتك بالرضا أو عدمه النتيجه وآحده اعتقد حضرتك سماع صوت أولياء الامور ده آخر فرصه لامكانيه نجاح الدفعه  في ظل قرارات حضرتك المتعدده والمتناقده طول العام واخرها موضوع كتاب المدرسه الطلبه فقدت الثقه في نفسها وامكانيتها وتحصيلها.

اضافت  إذا تكرمت معالي الوزير لو حضرتك هدفك نجاح الدفعه ونجاح تجربتك فهناك فرص كتيره ومازال الوقت امام حضرتك أين النماذج الاسترشاديه كعامل مساعد لطالب إحنا دلوقتي مش مهم نمتحن بأي إليه المهم مستوي الامتحان كمان لو تفتكر حضرتك إللي صرحت من شهور بامكانيه دخول الطالب بالكتاب وكتابه ملاحظات فهل من الطبيعي إن الوقت ده قبل الامتحان بأقل من شهرين ااقول الطالب عدل طريقه مذاكرتك بدل ما يكون الوقت ده للمراجعه الثانويه العامه  كل سنه بيراجع من شهر ٢ فهل ده وضع طبيعي كل مشكله يليها مشكله أكبر سلسله من المشاكل

اما نهي  شمس فاكدت اكيد هقول امتحان ورقى بعد اللى شوفناه فى السنتين اللى فاتوا واتكرر مع اولى وتانيه ثانوى وامتحانهم بقى ورقى للمهزلة اللى حصلت. فمش معقول هقول الكترونى واضيع مستقبل بنتى بايدى وهيه طالعه عينها ليل ونهار فى نظام جديد عليهموزمايلها قفلوا الكتب وقالوا مش هنذاكر لانهم هيفتحوا تليجرام ويغشوا زى ما حصل مع اولى وتانيه ثانوى..مفيش اى ضمان للامتحان غير الورقى..على الاقل هلاقى حاجه ارجعلها لو فيه مشكلة..انما التابلت مفيش اثبات انها حلت حاجه او دة غش...وفى الاخر اللى ذاكر وطلعت عينه يتظلم واللى بيتفسح هو اللى يتفوق..لا ضمان الا امتحان ورقى موحد 

قال محمد  السعيد  ولي امر استاذنا الفاضل في حالة عقد الامتحان إلكتروني نرجو أن تنزل الوزاره نماذج امتحانات محاكاة للامتحان الأصلي
أن تحدد الوزارة لجنة لمراجعة الامتحان وحله قبل إدخاله على السستم حيث انه التصحيح إلكتروني وسمعت انه لايوجد تظلمات لهذا العام لإتاحة فرصه التحسين وجود بدائل في حاله حدوث أي طارئ لاقدر الله مثل بطئ النت أو السيرفر أو خروج الامتحان بحيث نعطي طمأنينة للأبناء  محتاجين التشديد على اللجان في المدارس حتى لا يتم الغش وأيضا لا يحدث تسريب لأنه يأتي بالسلب على الطالب المجتهد.

قالت  مني حافظ ولية امر  للاجابه علي سؤال حضرتك بما انه تم الاستقرار علي ان يستكمل الطلاب العام الدراسي بالامتحان الالكتروني اولا ضمان عدم الاضرار باي طالب يسقط عنده السيستم لاي سبب كان ثانيا توفير بديل في حاله عطل التابلت فجأه لانه من غير الطبيعي ان يتم تاجيل امتحان طالب لسبب خارج عن ارادته لاننا نتعامل مع جهاز الكتروني معرض للكسر او العطل المفاجئ ثالثا عمل غرفه عمليات برقم تليفون متاح لكل الطلاب للابلاغ عن اي عطل او سقوط للسيستم و يتم الابلاغ داخل و اثناء اللجنه برقم شكوي و محضر ليضمن حق الطالب و ليست شكوي الكترونيه من المنزل 
و اخيرا نتمني الخير و التوفيق و النجاح  لكل الطلاب.

 ويحسم  محمد  جاد   موجه  عام  جغرافيا   بالبحر  الاحمر المناقشات  مؤكدا اولا. نتمنى أن تكون انتدابات المعلمين بالتبادل مع المدارس في نفس نطاق الإدارة حتى يكون الملاحظ والمراقب في راحه نفسيه ودون عناء وبالتالي سينعكس ذلك على الطلاب وتكون الأمور  على مايرام                                      
ثانيا... نتمنى صياغة اسئله مبسطه تجمع بين الفهم والتذكر  وما يحتوية المنهج وخاصه انها التجربة الأولى للثانويه العامه هذا العام وسوف تكون بالتدريج تجربه ناجحه كما تم نظام البوكليت بنجاح بالرغم من معارضة الغالبية العظمي له في بداية الأمر واستمر البوكليت الورقي بنجاح
ثالثا..  تنبع الطمأنينه من السادة اوليأء الأمور لابنائهم الطلاب اولا ثم يأتي دورنا كمعلمين وقائمين على لجان الامتحانات في خلق جو هادئ لأبنائنا دون أي مشكلات داخل اللجان او خارجها رابعا... الامتحان التجريبي القادم بعد العيد ان شاء الله لابد أن يكون صورة استرشادية مستنسخه بالكامل لما سيتم عمله في الامتحان الأصلي النهائي في يوليو وبنفس الياته.... وفي النهاية نحن العاملين في مطبخ العمليه التعليميه اوليأء امور أيضا وابنائنا ليس لهم امتحان منفصل او مميز عن ابنائكم  وجميعنا يبحث عن الطمأنينة  

ويختتم  عمرو جاويش  معلم  خبير  لغة  عربية ثانوي  الحوار  قائلا أتمنى في مادة اللغة العربية أن يقيس الامتحان نواتج التعلم فعلا ، وأن تكون معاني الكلمات والجموع من الثروة اللغوية التي استقاها الطالب في المرحلة الثانوية، حتى لا يضيع جهد أبنائنا الطلاب.





يمكنك مشاركة الخبر علي صفحات التواصل

اترك تعليق