من مطبخ صابرين..احلى برفيترول شهى ولذيذ للشيف مروة امارة

تعرفى على طريقة عمل البرفيترول بطريقة سهلة وسريعة ولذيذه للشيف مروة امارة



( البروفيترول )
المكونات :
كوب دقيق
كوب ماء
تلت كوب زبده
معلقه كبيره سكر
٤ بيضات 
فانيليا
ذرة ملح

الطريقه :
في حله على النار نضع المياه و الزبده و أول ما تغلي ننزل الدقيق و السكر و ذرة الملح و نقلب كويس اوي لحد ما الدقيق يختفي تماماً و نطفي و نسيب العجينه تبرد و نبدأ نضيف البيض و الفانيليا تدريجي و نضرب بالمضرب او في العجان لحد ما البيض يختفي و العجينه تندمج كويس و هنلاحظ أثناء إضافة البيض ان العجينه بتفصل لكن مع استمرار الضرب او العجن هتختلط كويس.
نضع العجينه في كيس حلواني و نبدأ نشكل في الصواني.

التسويه :
هندخل الصنيه فرن سخن على درجة حراره ٢٠٠ لمدة ربع ساعه و بعدين نهدي الحراره ل ١٧٠ لمدة ربع ساعه و بعدين نهدي الحراره ل ١٥٠ لمدة ربع ساعه كمان و نختبره لو استوى نخرجه من الفرن و لو لسه في عجين من جوه هنسيبه كمان ربع ساعه يعني اجمالي مدة التسويه من ساعه الا ربع لساعه و نطفي و نخرجه و نحضر الحشوه .

 الحشوه :
كوب باستري كريم بودر
كوب كريمه او لبن 

الطريقه :
نضرب الباستري مع الكريمه او اللبن لحد ما نوصل للقوام المظبوط و نضعها في كيس حلواني و نحشي الإكلير .

مكونات الجناش او صوص الشوكولاته :
كوب كريمه او لبن
٢ كوب شوكولاته بالحليب مبشوره
مكعب زبده صغير

الطريقه :
في حله على النار هنحط الكريمه او اللبن و لما يسخن نهدي الحراره و ننزل الشوكولاته و الزبده مع التقليب لحد ما تسيح و نطفي و نسيب الجناش يبرد و نستخدمه .

التزيين :
خطوط من النوتيلا
مكسرات مجروشه

 





يمكنك مشاركة الخبر علي صفحات التواصل

اترك تعليق