يوميات مهندس مشاكس

من ذكرياتي في الكليه # ٣

يكتبها: تامر راغب

" اشكال هندسيه "



من حظي الحلو اني حضرت محاضره بالصدفه لدكتور ماده من مواد الرسم الهندسي .

وفي المحاضره التانيه قدرت اقنع صديقي الصدوق انه يحضر معايا .

مش حقدر اذكر اسمه هنا علشان ميزعلش .

المهم من حظنا الاغبر ، فاجئنا الدكتور اول مادخل بامتحان مفاجئ .

وكان صديقي قاعد جمبي كعادته فقولت اعمل فيه مقلب علي السريع .

اول ما الدكتور قال ان فيه امتحان وشفت سؤال الامتحان ، روحت واخد نفس عميق وروحت قايل بصوت عالي يسمعه صاحبي " الحمد لله "

صديقي : ياتامر انت ياض .

انا : ايوه ؟

صديقي : ايه النظام هو انت مبسوط كده ليه ؟

انا : اصل المحاضره اللي حضرتها المره اللي فاتت الدكتور شرح طريقه رسم المسئله دي .

وابتديت استخدم ادوات الرسم اللي معايا وارسم سمبوكسات ومعينات داخله في بعضها وعمال آخد المقاسات ومنهمك .

وكل ما اعمل شكل يسألني صاحبي

صديقي : هو انت ايه اللي بترسمه ده .

انا : وطي صوتك وانقل مني بسرعه قبل ما الدكتور يشوفك .

صديقي : بس الناس اللي حوالينا راسمه رسمه مختلفه عننا خالص ؟

انا : يامتخلف في طريقتين للرسم .

صديقي : طيب تمام .

وقعد صديقي ينقش اللي برسمه بالمقاسات وانا منهمك جدا وعامل نفسي براجع بدقه .

كل ده تمام لغايه ما الدكتور ابتدي يلف يبص علي الطلبه وهي بتحل .

ومن حظ صديقي المنيل انه كان قاعد علي طرف المدرج .

الدكتور وهو معدي بص في ورقته لقاه راسم سمبوكسات واشكال لاتمت باي صله من قريب او بعيد للرسم المطلوب .

الدكتور : هو ايه اللي انت بتعمله ده

صديقي : بحل حضرتك .

الدكتور : بتحل .....هاااااا او او او او بتحل ايه !!!!!! وراح ساحب الورقه منه و اخد اسمه وقاله تجيلي مكتبي بعد المحاضره .

انا : حموت من كتر الضحك ودافس راسي في ورقتي وبجد بعيط من كتر الضحك .

الباشا صاحبي كان فاكر ان الدكتور سحب ورقته علشان شافه بيغش مني .

ولما عرف اني بعته وخليته يرسم سمبوكسات واشكال لامعني لها ، قعد يزعقلي بصوت عالي

الدفعه سمعت الحوار اللي بينا قعدوا يضحكوا عليه طبعا .

و تخيلوا حضراتكم انه كان عايز يتعدي عليا بالضرب مع اني صديقه جدا

المهم بعد ما صديقي هدي شويه ، راح باصصلي وقالي وهو متنرفز وقالي وهو مغلول :

صديقي : طيب ياحلو الدكتور حيشوف السمبوكسات اللي انت عاملها في ورقتك وانا نقلتها منك وحيبهدلك انت كمان .

انا : طبعا مش انا اللي اقع الوقعه دي نسيت اقولك اني طبعا مسلمتش ورقتي قلت اعمل نفسي وكأني كنت غايب في اليوم ده احسن مائه مره ما الدكتور يشوف السمبوكسات اللي انا عاملها وانت ناقلها مني .

هنا بجد قعد يبصلي في ذهول وعرف انه شرب الموضوع لوحده وانه احتمال يشيل الماده كمان كلها بسببي .

الي صديقي العزيز : السماح بقي بعد السنين دي ، والله بحبك جدا وانت عارف كده .

أسعد الله اوقاتكم ودمتم بخير





يمكنك مشاركة الخبر علي صفحات التواصل

اترك تعليق