حاجه تجنن
بتقول ناس طيبه للبيع؟؟ جبتها بس منين دى ياعم؟؟ تقصد طيبه على حنيه ؟؟


  كلمات: مياده الشربيني

بتقول ناس طيبه للبيع؟؟
جبتها بس منين دى ياعم؟؟
تقصد طيبه على حنيه ؟؟
طب بيشيلو عن غيرهم هم؟؟
ملقيش عندك حد يهون
لو زعلانه يقول معلش؟
حد يداوى الجرح .. يطبطب 
حد يواسي وما يملش؟ 
ولا أقولك .. بس إستنى 
أفكر قبل ما اقول واتمنى 
أصل دى حاجه جديده صراحه 
حاجه غريبه أوى ف زمنا
إنى أقابل حد هيسمع 
شكوى لقلب وبيها يهتم
ولا يكون ف حياته مهم
لأ مش كده !! دا يبقا أهم
 وإنه يكون السند الأول
وقت الشده ووقت الغم 
انت حقيقي عندك ناس 
من دى للبيع .. والله ياعم؟؟
يمكن تقصد حبة طيبه؟
أصل عطاء كده مبصدقش
يعني حقيقي دى حاجه غريبه
وماتزعلش .. متتصدقش !!  
أعرف ناس على أد ما إدو
طول الوقت كتير أوى عِدو
وإللى إدوهم عمر بحالو 
أول ناس ف كيانهم هدو  
حتى الواحد شاغله سؤال 
دايماً ييجى علطول ع البال 
هو قدرهم التضحيه
 ويبقى الحال على هذا الحال ؟؟
يمكن حكمه  طب ف حياتهم ؟
ذنب بيخلص قبل مماتهم ؟
تمن الطيبه الدفع مقدم
سقطت يعني من حساباتهم؟
شوفت ياعم !! قربت أتجن 
وانت بعرضك نازل زن 
طيب عادى نشوف ونجرب 
واحكم قبل ما قلبي يقرب
بس ياريت تختارلى القلب 
إللى يضحي عشان بيحب  
وإللى بيعرف إن الجرح 
يدمر قلب ويقضى عليه
ويعجزه قبل ما بيشب
وكتر بيعهم قد ماتقدر
ووزع منهم بالمجان
أصل الناس إللى هتحتاجهم
فقرا ومحتاجه للإحسان 
نقى عشانهم حد يطبطب
حد يحس وحد يهون
وإبعد جداً عاللي يبين 
حاجه وفجأه تلاقيه يلون
بس أمانه لو يوم قابلك
حد الغالي رخص يوم  عنده.
 وقالك أرجع .. قوله يحنن .
بس بجد البيعه غريبه 
ناس للطيبه ؟؟ حاجه تجنن
   





يمكنك مشاركة الخبر علي صفحات التواصل

اترك تعليق